حوزہ نیوز ایجنسی کی رپورٹ کے مطابق، مدرسہ خاتم النبیین (ص) جیکب آباد بلوچستان پاکستان میں ادارۂ مرکز تبلیغات اسلامی کے زیر اہتمام ایک روزہ اسلام شناسی ورکشاپ کا اہتمام کیا گیا، ورکشاپ میں قرآن کریم، حدیث، احکام، عقائد اور حالات حاضرہ کے موضوع پر درس دیا گیا اور امر بالمعروف کے عنوان سے اجتماعی مباحثہ ہوا۔
اس موقع پر شرکاء سے خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا کہ اللہ تعالیٰ نے ھدایت انسانی کے لئے ہر دور میں معلم اور کتاب بھیجی وہ معلم انسانیت اس آسمانی کتاب کی مجسم تصویر ہے، لہذا دین اسلام میں تعلیم، قلم اور کتاب کو بڑی اہمیت دی گئی ہے۔ علم اور کتاب سے دوری معاشرے کے لئے نقصان دہ ہے۔
انہوں نے کہا کہ دین اسلام دین فطرت ہے جو نجات انسانی کا ضامن ہے۔ دنیا کے مادی مکاتبِ فکر انسان کی حقیقت کا ادراک نہیں کر سکے اس لئے وہ انسان کے لئے ناقص نظامِ حیات لے کر آئے جس کی پیروی بشریت کے لئے خسارے پر مبنی ہے، جبکہ دینِ اسلام مکمل نظام حیات ہے جس کی پیروی عالم بشریت کو دنیا اور آخرت میں عزت و سربلندی اور کامیابی عطا کرتی ہے۔
اسلام شناسی ورکشاپ میں مجلس علمائے شیعہ کے ضلعی صدر علامہ سیف علی ڈومکی اور برادر اللہ بخش سجادی نے بھی درس دیا۔
آخر میں اسلام شناسی ورکشاپ کے شرکاء کو کتابوں کا تحفہ پیش کیا گیا۔
